Nus tschertgain: persunas cun in’istorgia communabla

Per l’avertura da la stagiun 2026/27 realisescha la Chasa da Litteratura dal Grischun ensemen cun l’artist svizzer Mats Staub il project artistic participativ «In Deinen Augen». Il project maina las participantas ed ils participants sin in viadi en il temp ed è in'experientscha extraordinaria per dus umans che s'enconuschan gia pli ditg.

Tgi accumpogna Vus dapi blers onns e pudess As guardar en ils egls la fin d'avust en l’Hotel Waldhaus a Segl-Maria? Vossa amia, Voss frar, Vossa partenaria, Voss biadi, Vossa mamma u in’autra persuna impurtanta?

En dus pudais Vus far part da quest project spezial. Nus ans legrain da persunas da l’Engiadina e da la Bregaglia sco era da giasts e collavuratur:as da l’Hotel Waldhaus a Segl-Maria.

·      Sa participar pon umans da tut las vegliadetgnas che s'enconuschan dapi almain nov onns – amias ed amis, commemb:ras da la famiglia, pèrs u parentella elegida.

·      Las persunas sesan ina visavi l’autra e sa guardan en ils egls. Ellas na discurran betg. Durant quest inscunter quiet pensan ellas a lur istorgia communabla, al preschent ed a quai che las spetga. L’inscunter vegn registrà sin video.

·      Las registraziuns vegnan fatgas en l’Hotel Waldhaus a Segl-Maria. In termin dura 30 minutas, la filmada però mo 3-7 minutas. Tut las persunas participantas survegnan lur registraziun sco regal persunal. Ils videos pon plinavant daventar part d’ina installaziun artistica da Mats Staub: in panorama da relaziuns umanas che vegn exponì a partir dal 2027 en differents lieus.

Termins: 21 fin 26 d'avust 2026
Lieu: Hotel Waldhaus a Segl-Maria
Annunzia: kommunikation@lithaus.gr

La participaziun al project è sulettamain pussaivla en dus e cun ina preannunzia. Las persunas duain s'enconuscher uschè ditg sco pussaivel.

In project communabel da la Chasa da Litteratura dal Grischun e da l’artist Mats Staub en collavuraziun cun l’Hotel Waldhaus a Segl-Maria.