Jürg Gautschi raquinta en sias istorgias curtas dal mintgadi, da inscunters allegraivels, irritants, divertents ed abissals cun il mund ed el sez. Nus fruntain sin furmiclas che refusan chips, enconuschain la vit selvadia che pretenda ses plaz en la stiva ed sentin il squitsch permanent da l’optimaziun persunala – en l’alimentaziun, en relaziuns d’amur u sin il plaz da lavur.

Ord questas scenas quotidianas nascha in mosaic da texts divertent, raquintà cun laconicitad, umor ed in ritmus viv. Giugs da pensar filosofic-absurds daventan scenas teatrals cun abissas grotescas ed eveniments dal mintgadi daventan spievel d’in malesser persunal u societal. Jürg Gautschi mussa nus cun in sbrinz d’egl las chaussas pitschnas e grondas dal mintgadi, per las qualas ans manca savens egl e temp.

Jürg Gautschi è stà durant blers onns schurnalist da cultura ed autur da films documentars tar la televisiun e radio svizzer SRF. Oz maina el l’emissiun da films documentars Cuntrasts tar Radiotelevisiun Svizra Rumantscha RTR. Dasperas scriva el istorgias curtas en rumantsch sco er raquints e texts per tribuna e radio. Ina selecziun da quellas è cumparida il 2023 en ses emprim cudesch «Cunterfem». Claudio Spescha ha tradì quellas en tudestg.

Il 2005 è Jürg Gautschi vegnì undrà als Dis da litteratura rumantscha a Domat cun il Premi Term Bel da la giuria sco er cun il premi dal public. Il 2023 è el stà in dals victurs dal concurs da scriver OpenNet dals Dis da litteratura a Soloturn.

Lectura: Jürg Gautschi
Moderaziun: Claudio Spescha