En «Generation Z» sa fatschenta la booktokra Valentina Vapaux a moda differenziada cun la cultura actuala da la giuventetgna. Tge impurtanza han influenzad:ras, quant fitg influenzeschan e rinforzan las medias socialas las rollas classicas da las schlattainas, co vesa propi or il mund online stgaffì da la branscha da la reclama e quant politica è la generaziun Z? 

Analisà vegn plinavant co che apps per datings midan l’amur e las relaziuns da questa generaziun e pertge che la generaziun Z vegn considerada sco la pli «solitaria».

Ils temas duain far attent:as lectur:as giuv:nas a dumondas relevantas per la societad ed animar el:las da reponderar lur moda da sa cumportar e da consumar tipica per lur generaziun.

Valentina Vapaux è autura, schurnalista e creatura da cuntegns per las medias socialas. Suenter avair fatg praticums tar il FOCUS Magazin e la New York Times ha ella scrit essays, columnas e poesias per il TITLE Magazin en lingua englaisa ed è stada ospitanta dal podcast politic «Pancake Politik» da l’ARD. Il 2021 è cumparì ses «SPIEGEL-Bestseller» «GenerationZ» en la chasa editura Graefe und Unzer. Ella ha studegià Scriver litterar a l’Institut per litteratura a Hildesheim ed a l’Universitad da Columbia. Per il mument lavura ella vi da ses project per in roman.