Tuts nus pudain duvrar bain speranza – dentant senza ina confruntaziun cun quai che ans fa vegnir vilads na va quai betg. Anna Rosenwasser sa deditgescha en «Herz. Strategias feministas e speranza queer» a dumondas che vegnan savens tschentadas ad ella sco activista: co pudain nus ans confruntar cun la realitad da violenza senza perder nossa confidenza? Nua cun nossa ravgia che sa sviluppa en discussiuns problematicas? Pertge èsi per bleras dunnas e persunas queer uschè difficil d’occupar spazi – e cun tge trics ans reussescha quai tuttina?

Ils texts descrivan realitads actualas da dunnas e persunas queer cun empatia ed umor. Els avran novas perspectivas, mettan en glisch quai che vegn memia savens malchapì ed encuraschan da betg desperar sulettamain, mabain da prestar resistenza creativa ensemen. Betg il davos conceda il cudesch invistas persunalas en la vita ed il mund da patratgs d’ina giuvna cussegliera naziunala.

Anna Rosenwasser è cussegliera naziunala ed autura dals cudeschs «Rosa Buch. Texts queer dal cor» e «Herz. Strategias feministas e speranza queer». Ella è schurnalista scolada e scriva professiunalmain dapi il 2008. Ella ha lavurà durant quatter onns sco directura da l’Organisaziun da las Lesbas Svizra, nua ch’ella ha tranter auter s’engaschada per la protecziun cunter discriminaziun e per la lètg per tuts. En sia veglia patria Schaffusa ha ella cofundà in lieu d’inscunter per giuvenils queer; ultra da quai è ella stada activa en la suprastanza da la pli gronda organisaziun da giuvenils LGBTQ, Milchjugend. Ses account d’Instagram tutga cun passa 50’000 persunas che la suondan tar ils chanals politics ils pli observads en Svizra. Cun sia columna «Rosenwasser» en Republik è ella vegnida elegida il 2024 sco columnista da l’onn.