Co tuna ina veglia istorgia en la lingua dad oz? E tge raquinta ina giuvna Scheherazade en il 21avel tschientaner? A questas dumondas sa deditgescha il project che vegn realisà la primavaira 2026 dal Literaturhaus Graubünden ensemen cun la classa chantunala 5Gc da Jennifer Ribeiro Rudin sco toc auditiv.

Punct da partenza furma la poesia sinfonica «Scheherazade» da Nikolai Rimski-Korsakow. L’ovra sa lascha inspirar da la collecziun da paraulas orientalas «1001 notgs», da la quala la protagonista Scheherazade sutminescha structuras da pussanza cun ses talent da raquintar e mantegna sia vita grazia a fantasia ed intelligenza. Questa figura, situada tranter tradiziun e resistenza, avra bleras pussaivladads per ina confruntaziun artistica contemporana.

En ina lavuratori da scriver che dura plirs dis cun l’autura grischuna Romana Ganzoni elavuran las scolaras ed ils scolars da la Scola chantunala Cuira agens texts che raquintan da nov la veglia istorgia da basa. En quest connex reflecteschan els dumondas che pertutgan er lur atgna realitad da viver: rollas da schlattaina, pussanza ed autodeterminaziun, resistenza e diversitad culturala. Lur istorgias, dialogs e scenas furman la basa per in toc auditiv.