Il pitschen chaun da Nina ha in’aversiun cunter utschels. Uschiglio na fiss Simon betg stà en cas d’envidar Nina sin in café, ed els na vessan mai scuvert tge che als collia.
Tim quinta. Cuverts da chanal, parcometers, chaschas da brevs. Sin il viadi da la scola a chasa na dastga el betg emblidar nagin. Ma in di cumpara ina gronda dogga – e tut va ord controlla.
La pitschna Dina ha en vardad num Devi. Ses bab, ch’ella n’ha mai enconuschì, ha dà ad ella quest num. Sia tatta dentant ha decis ch’il num Dina saja pli simpel. Tuttina è ella autra che tschels, perquai che sia pel è brina.
La scolarina Anju sa retira gugent en il guaud. Finalmain deliberada dals sguards e pleds da sia famiglia, scuvra ella in lieu secret mo per ella.
Ed a Kantenhain procura ina pitschna giatta naira per agitaziun.

Gianna Olinda Cadonau raquinta dal ester, da l’esser auter, da la tschertga da vegnir acceptà, da l’amicizia, d’enigmas e da miraclas. Tranter las lingias da sias istorgias d’ina gronda densitad atmosferica e finezza artistica sa sviluppa ina ferma forza da fascinaziun. Cun gronda sensibilitad e subtilitad illuminescha ella, en ina lingua poetica e clera, las relaziuns tranter sias figuras – e reussescha uschia da render visibel quai che na sa strusch dir.

Prelecziun: Gianna Olinda Cadonau
Musica: Jan Rehwinkel
Moderaziun: Martina Mutzner